Nan kad vizit travay li te fè nan baz Inite Taktik Anti-Gang (UTAG), Chèf Polis Nasyonal la, André Jonas Vladimir Paraison, lanse yon avètisman ki pa kite oken konfizyon. Daprè deklarasyon li, Lapolis Nasyonal Ayiti rete mobilize lajounen kou lannwit sou tout teritwa a pou garanti sekirite chak sitwayen.
Pou sa, li fè konnen nenpòt moun ki ap chache brase lòd piblik pral jwenn fòs polisye yo kanpe fas a yo. Deklarasyon sa a, daprè DICOP (Direksyon Kominikasyon PNH), vize montre detèminasyon PNH pou sispann tout zak ki kapab mete lavi popilasyon an, an danje. Anplis, li se yon mesaj klè pou gwoup ki ta anvi defye otorite leta a.
Nan menm lojik la, responsab la mete aksan sou misyon enstitisyon an : pwoteje popilasyon an, retabli kalm, epi fè konfyans retounen nan estrikti sekirite piblik yo. Pou li, sekirite se yon dwa pou tout Ayisyen, se yon obligasyon pou Lapolis asire dwa sa a chak jou.
An dènye konsiderasyon, mesaj sa a montre volonte PNH pou reprann kontwòl espas piblik yo epi diminye presyon sou tout fòm banditis ki kontinye menase estabilite peyi a. Se yon direksyon ki klè, ki mande kowòdinasyon, volonte ak kontwòl strik pou rive sou rezilta yo.
Pou fini, deklarasyon sa a se plis pase yon avètisman : li reprezante yon angajman ofisyèl PNH pou mete popilasyon an anvan tout lòt konsiderasyon. Yon pozisyon ki, si li aplike ak rigè, kapab louvri pòt pou plis sekirite, plis konfyans epi finalman plis espwa pou peyi a.
Brinia ELMINIS
