Nan okazyon komemorasyon Batay Vètyé a, majistra Kenskòf la, Massillon Jean, salye travay enpòtan fòs lòd yo ap mennen depi plis pase nèf mwa nan komin nan. Daprè li, detèminasyon plizyè inite espesyalize PNH la te pèmèt Kenskòf reprann yon nivo estabilite ki te vin menase anba presyon gwoup ame yo.
Majistra a souliyen batay sa a mande anpil sakrifis. Li raple polisye yo ap riske lavi yo chak jou pou pwoteje popilasyon an. Selon li, kolaborasyon sere ant otorite lokal yo, estrikti kominotè yo ak lapolis se youn nan eleman ki fè komin nan kòmanse respire pi byen jodi a.
Malgre pwogrè sa yo, majistra Massillon Jean rekonèt travay la pa lwen fini. Li fè konnen gen kèk zòn toujou anba enfliyans gwoup kriminèl “Viv Ansanm”, yon sitiyasyon ki mande yon aksyon kontinyèl, planifye epi pi entansif pou evite retou vyolans lan.
Nan sans sa a, li mande Direksyon Jeneral Polis Nasyonal la ogmante resous yo, ranfòse prezans fòs lòd yo sou teren an, epi akselere operasyon ki vize derasinen nèt gwoup ame ki kontinye menase sekirite kolektif la. Li ensiste pou PNH la kenbe menm nivo disiplin, detèminasyon ak estrateji ki te pèmèt avansman yo deja reyalize.
Majistra a lanse tou yon apèl bay popilasyon an : kontinye kolabore ak lapolis, pataje enfòmasyon ki itil, epi evite tout aksyon ki ka mete lavi yo an danje. Selon li, sekirite Kenskòf se yon travay kolektif ki dwe fèt nan respè dwa moun ak prensip Leta de dwa.
Pou fini, li klarifye objektif la : fè Kenskòf tounen yon zòn ki an sekirite. Menmsi PNH la deja reprann kontwòl plizyè katye pandan mwa ki pase yo, gen gwoup ame ki toujou reprezante yon risk. Sa mande operasyon kontinyèl, rapò klè sou aksyon yo, epi yon kowòdinasyon dirèk ak otorite lokal yo pou elimine dènye nwayo gang yo, retabli konfyans popilasyon an, epi lanse rekonstriksyon komin nan sou baz solid.
Brinia ELMINIS
